CEBU, Philippines - Usa ka nursing attendant ug usa ka basurero nakabsan sa kinabuhi pinaagi sa paghikog sa managlahing dapit sa Metro Cebu sa miaging adlaw.
Ang nursing attendant nailhan nga si Anastacio Tabanao, 39, ulitawo, kinsa lumad nga taga barangay Malabon, lungsod sa Moalboal apan didto maghikog sa iyang lawak sa Center for Behavioral Sciences sa barangay Sambag 2, dakbayan sa Sugbo.
Samtang ang basurero mao si Joel Empuerto, 29 nga taga sitio Calachuchi, barangay Maghaway, dakbayan sa Talisay.
Si SPO1 Ruth Violanggo sa Homicide Section sa Cebu City Police Office misaysay sa Banat News nga si Tabanao naghikot og extension wire sa iyang liog kansang pikas tumoy gigaid sa sagbayan sa iyang lawak ug patay na nga nagbitay dihang nakita sa usa sa mga kauban niini nga si Arnold Faunillan.
Matud pa ni Violanggo nga aduna silay nakuhang suicide note sa katre nga higdaanan ni Tabanao nga alang sa iyang pag-umangkon nga si Richil Tabanao.
Tipik niini nagbutyag nga “Relax lang, no problem ug very sorry to my good friends” diin ang suicide note gibutang sa katre kun asa siya naghigda.
Midugang si Violanggo nga si Tabanao naghambin og sakit nga high blood ug diabetes nga posibling usa sa hinungdan sa pagkutlo sa kinabuhi niini.
Samtang si Empuerto migamit usab og pisi nga maoy gihikot sa iyang liog ug ang tumoy gigaid gihapon sa sagbayan sa ilang balay dayon nagbitay nga namatay nga nasak-an sa iyang higala ug silingan nga si Julio Cabiles kagahapon sa buntag.
Si SPO1 Mikie Espina sa Talisay City Police Station mibutyag sa Banat News nga si Empuerto nagpuyo sa iyang balay sa Maghaway kauban sa iyang tulo ka mga anak nga babaye human biyai sa iyang kapuyo kinsa milarga ngadto sa Manila niadto pang miaging Hulyo niining tuiga.
Niadtong Martes sa hapon si Empuerto ug si Cabiles nag-inom tungod kay adlaw usab sa usa sa mga anak niini.
Matud pa ni Cabiles nga daan na nga misulti si Empuerto nga magpakamatay tungod sa iyang kaguol nga gibiyaan sa iyang kapuyo.
Apan nagtuo si Cabiles nga nagkomedya lang kaniya si Empuerto, sa maong higayon apan nakurat na lang siya kagahapon sa buntag dihang gitinuod gyud diay sa iyang higala ang gipamulong niini kay sa iyang pag-adto sa balay ni Empuerto nagbitay na kini sa sagbayan nga wala nay kinabuhi.
Nagtuo ang kapolisan nga kaguol sa pagbiya sa iyang kapuyo ang hinungdan sa paghikog ni Empuerto. (BANAT NEWS)