CEBU, Philippines - Gironda sa mga sakop sa Criminal Investigation and Detection Group (CIDG-7) kagahapon sa buntag ang usa ka bodega sa mga pabuto diha sa dakbayan sa Mandaue.
Mokabat sa 107 ka mga kinartong pabuto ang nasakmit sa grupo ni Inspector Delfin Bontuyan pinasikad sa search warrant nga giluwatan ni Regional Trial Court Judge Teresita Galanida.
Gibana-banang mokabat sa tunga sa milyon ka pesos ang kantidad sa mga pabuto nga nakuha gikan sa maong bodega nga gipanag-iya sa usa ka Mariano So nga giingong wala diha atol sa pagpangronda.
Saysay pa ni Bontuyan nga sa miagi pa silang semana mipahigayon og surveillance sa maong bodega.
Gipasabot usab ni Bontuyan nga base sa balaod gidili ang mga imported nga pabuto dinhi sa nasud tungod kay lupigon niini ang mga local manufacturers tungod sa kabarato niini.
(BANAT NEWS)