CEBU, Philippines - Ang disposisyon o kinaiya sa panan-aw sa tawo ning kinabuhia, di gyud magka-pareho kay nagbase man kini sa hinungdan o epekto diha sa naamggohan nga sitwasyon o kasinatian. Ug kun dili man, may uban sad nga maingon ta nga iya gyud nga pagkatawo, nga nakabaton og halapad nga panan-aw sa kinabuhi.
Apan karon sa atong panahon, mahimo na kini nga matun-an nato pinaagi sa edukasyon o kaha paghagpat og mga maayong pagtulun-an nga makita diha sa mga aktuwal nga panghitabo ug ingon man pinaagi sa kasaysayan sa kinabuhi nga maoy modeterminar sa haom o maayong disisyon nga angay tang himoon.
Usahay duna kitay mamatikdan nga tawo, kinaiya gyud niya nga magduko magliraw sa gilaktan nga kun may makit-an diha sa agianan, pamuniton ang bisan unsa nga gituhoan niya nga wa nay kapuslanan sa uban apan alang kaniya mahimo kining bilihon ig-abot sa panahon. Sama sa mga sensilyo, piyesang metal, ug uban nga bisag unsang mga ginagmay nga gamit nga gipanglabay na.
Kinaiya nga manghiposay og biya, nga gitigom diha sa mga lainlaing sudlanan. Hangtod nahimo siyang dangpanan sa mga tawong namasin namili nga aduna pay mapuslang hiniposan nga magamit sa ilang tuyo. Hangtud wala damha nahimo niya kining tuburan o tinubdan nga nakapaasenso sa iyang kinabuhi.
Ug labaw sa tanan, nahimo sab kining kabilin ngadto sa malampuson niyang sakop sa pamilya, nga maoy namat-an ang kanunay nga gitudlo o gisilsil sa alimpatakan ang pagsagop sa hugtanon nga disiplina sa pagpahalapad sa panan-aw sa positibong kinabuhi. Angay gyud huptan kining bulawanong hiyas ang pagtratar nato sa isigkatawo o mga butang. Nga kun ugaling wa may kapuslanan sa atong pagtan-aw karon apan mahimo kining bililhon ig-abot sa adlaw.
(BANAT NEWS)