CEBU, Philippines - Usa ka rekoreda ang gihimo sa kapolisan sa Larena sa Siquijor pinangulohan ni Insp. Rommel Luga diha sa mga kabaybayunan ug kabukiran aron pahibaw-on ang mga molupyo nga mobalhin sa mas luwas nga mga dapit ug pagdili sa mga mananagat nga makapanagat tungod sa bagyong Pablo.
Alas-11 pa sa buntag kagahapon naputol na ang linya sa kuryente sa maong lungsod. Si Arlene Buhian sa DepEd-Siquijor division misuspenso na sa tanang klase sa mga tunghaan ug gimandoan ang tanang prinsipal ug school in-charge nga iandam ang mga lawak-saringan alang sa posibilidad nga himuon kining evacuation centers.
Samtang si Siquijor State College administration Sheila Cabanlit miingon nga gideklarar na sa ilang presidente nga kanselahon ang klase tungod gihapon sa maong bagyo ug mabalik lang sa normal ang klase ini og labay na sa peligro.
Si Governor Orlando Fua Jr., ug Arturo Pacatang, executive director sa Siquijor Provincial Disaster Risk Reduction Management Council (PDRRMC) mimando na sa pagkanselar sa trabaho sa tanang buhatan sa gobiyerno lokal man o nasyonal tungod gihapon sa maong bagyo.
Samtang giandam na usab ang mga rescue teams gikan sa nagkadaiyang council committee diha sa PDRRMC Operation Center alang sa dinaliang pagresponde.
(BANAT NEWS)