CEBU, Philippines - Gisubli sa siyudad sa Sugbo kagahapong adlawa ang sisterhood agreement niini ug Harlemmermeer City sa Netherlands. Nasayran nga 20 na ka tuig nga nagsilbing sister city sa siyudad ang Harlemmermeer City ug nagtinabangay ang duha ka mga siyudad sa nagkadaiyang mga programa.
Miduaw kagahapon sa dakbayan ang pipila ka mga opisyales sa Haarlemmermeer aron saksihan ang pinirmahay sa kasabotan nga gipangulohan ni Mayor Michael Rama ug sa mayor sa Haarlemmermeer nga si Theo Weterings.
Gipatigbabaw sa ilang kasabotan ang paghatag og kahigayunan sa duha ka mga siyudad nga masuta ang tagsa-tagsang mga proyekto niini sa matag lugar isip kabahin sa sisterhood agreement. Samtang gipadayag ni Weterings nga dako ang iyang pasalamat sa siyudad sa Sugbo gumikan sa pakig-alayon niini sa tagsa-tagsa nila ka mga programa aron magpabilin ang paghatag og mga kaayohan ngadto sa ilang mga konstituwente. Usa sa proyekto nga nahulma nila kaniadto nga mao ang pag-abag sa mga kabatan-onan sa pagtukod og mga balay sa pipila ka mga barangay sa siyudad sa Sugbo.
Motabang usab ang Harlemmermeer City sa mga programang panglawas sama sa tabang niini sa Cebu City Medical Center (CCMC). (BANAT NEWS)