CEBU, Philippines - Na-rescue sa kapitan ug sa mga tanod sa barangay Pooc ang usa ka 21-anyos nga dalaga kinsa giingong gilugos ug gitanggong sa apartment sa usa ka American national niadtong Domingo sa gabii human sa tulo ka adlaw nga pagtanggong sa langyaw sa maong dalaga. Gitanggong karon sa kapolisan ang suspetsadong 66-anyos nga temporaryong nagpuyo diha sa apartment sa miarestong si Kapitan Doroteo Emit sa sitio Cainta sa nahisgutang barangay sa siyudad sa Talisay.
Ang langyaw gikatakdang pasakaan kagahapon og kasong pagpanglugos sa piskalya sa siyudad sa Sugbo.
Ang biktima nga taga lungsod sa Lilo-an nahibaw-an lang nga giamong-amongan dihang ang suspetsado ug si Emit nagkalalis tungod sa pagsawom sa suspek nga nag-sandals sa swimming pool sa resort nga gipanag-iya sa kapitan.
Si Emit nga nahinabi sa Banat News mibutyag nga usa ka buwan pa lang nga nag-abang sa iyang apartment ang langyaw ug giingong nangangkon nga usa ka broker og mga balay paabangan o kabtangan nga ibaligya ang maong langyaw ug gani giingong duna kini website.
Sumala pa ni Emit sa website sa maong langyaw giingong nag-hire usab kini og kawani ug ang biktima diha mi -apply apan buot sa suspek nga personal nga mainterbyu ang biktima maong niadtong Nobiyembre 15, 2012 nagkita sila sa usa ka dakong mall sa Tabunok alang daw sa final interview.
Apan human mangaon sa mall giingong giagni sa suspek ang biktima nga magkuyog sila didto sa iyang ‘property’ sa sitio Cainta kay didto na lang himuon ang final interview.
Matud ni Emit nga nanghambog ang maong langyaw sa biktima nga iya ang apartment nga iyang gipuy-an. Apan imbes nga interbyu gilugos na hinuon niini ang dalaga sulod sa banyo. Ang paglugos giingong nasundan pa sa misunod nga mga adlaw.
Ug niadtong Nobiyembre 18 gidala sa suspek ang dalaga sa resort ni Emit ug didto nahitabo ang panaglalis. Tunga-tunga niini diha nakakita og higayon ang dalaga sa iyang gidangatan sa mga kamot sa suspek hinungdan nga gipadakop ni Emit ang maong langyaw. Giingong gikuhaan sa suspek sa pitaka ug cellphone ang biktima aron dili kini makatawag sa mga ginikanan o makaeskapo. (BANAT NEWS)