CEBU, Philippines - Samtang nanganti ang kapolisan sa Talisay nga sila na lay mosang-at og kasong kriminal batok sa anak ni Talisay City Mayor Socrates Fernandez nga si Joavan kung dili mopasaka og kaso ang tagdumala sa gasolinahan nga giingong gipusil sa mayor niadtong milabay’ng semana, dili gyud motahan sa kapolisan si Joavan.
Sa gipadalang text message ni Joavan sa Banat News matud pa niya nga wala siya’y planong motahan tungod kay wala man siya makapatay og tawo ug wala say reklamong gisang-at batok kaniya.
“Ngano mo-surrender man ko nakapatay diay ko? Duna bay case filed against me ug usa pa lapas na sa 24-hours wala nay hot pursuit,” matud pa ni Joavan sa iyang text message gipadangat sa Banat News.
Mibahad siyang iyang ireklamo ang polis nga modakop kaniya ug dili niya lung-an hangtud nga dili mataktak sa serbisyo.
“Kay kung ilaha kung dakpon pwes karon na siguro mosukol na mi ikiha namo hangtud matangtang sa serbisyo ang police nga modakop nako,” matud pa niini.
“I have my private lawyer ug duna tay balaod nga gisunod ning atong gitumban nga yuta busa isip usa ka tawo respetoha pud ang akoang pagkatawo aron dili magkaunay puro ra ta taga Cebu,” pasabot pa ni Joavan
Samtang si Supt. Eddie Recamara, ang hepe sa kapolisan sa syudad sa Talisay mipadayag nga wala na siya maglaom pang motahan si Joavan maong iyang gimando ang pagdakop niini tungod kay duna silay igong basehan aron kini sikupon.
“Amo na na trabaho sa pulis sir basta makita namo siya duna tay legal basis kay gadala2x man siya armas,” matud pa ni Recamara sa gipadalang text niini sa Banat News. (BANAT NEWS)