CEBU, Philippines - Kutob na lang sa Lunes sa sunod semana ang gitagal sa Commission on Election (Comelec) pagdawat sa isang-at nga petisyon nga mokwestyon sa ligalidad sa residensya sa usa ka botante nga mibalhin sa pagparehistro ngadto sa laing lugar
Si manlalaban Marchel Sarno, ang Cebu City Election Officer sa North District mibutyag sa Banat News nga sa pagkakaron nagpadayon pa sila sa pagpanawat sa mga petisyon nga nag-kwestyon sa residensya sa usa ka rehistradong botante. Giklaro ni Sarno nga ang petisyon nga magkwestyon sa pinuy-anan sa usa ka botante mao nalay ilang giatiman karon kay napupos na ang tagal niadtong mokwestyon bahin sa residensiya sa usa ka kandidato.
Iyang gipasabot nga ubos sa lagda sa Comelec, kadtong mo-transfer og rehistro kinahanglang nagpuyo og unom ka buwan sa maong lugar nga iyang balhinan sa pagparehistro una mahimong balido ang iyang rehistrasyon.
Kini kinahanglang pamatud-an sa mga saksi ug labaw sa tanan sertipikahan sa kapitan sa barangay sa dapit nga iyang giestahan pagsuta nga nakaabot na og unom ka buwan o labaw pa niini una siya makaparehistrong legal sa maong dapit. Nunot niini giklaro usab ni Sarno nga sukad kagahapon wala pa usab siyay nadawat nga petisyon nga nagkwestyon sa residensiya sa aktres nga si Ruffa Gutierrez ug mga igsoon niini nga sila si Richard Gutierrez ug Elvis ingon man amahan nga si Eddie Gutierrez kinsa pulos namalhin og rehistro sa north district ning dakbayan aron pagsuporta sa kandidatura sa asawa niini nga si Annabele Rama kinsa milansar sa pagka -kongresista atbang ni kanhi kongresista Raul del Mar sa north district.
Matud ni Sarno nga kun way masang-at nga petisyon batok sa usa ka botante, magpabilin kining lihitimong botante sa usa ka dapit diin siya nagparehistro.
Gitin-aw usab niya nga kun dunay petisyon nga masang-at sa ilang buhatan iduso dayon nila kini sa Comelec Manila aron maoy mopakanaug sa desisyon.
(BANAT NEWS)