CEBU, Philippines - Mga eksperto sa terorismo sa nasud sa Australia mianhi sa Sugbo aron tudloan ang kapolisan ug kasundalohan dinhi sa mga angayan nilang makat-unan kabahin niining maong matang sa krimen.
Si Sr. Supt. Agusto Marquez ang kasamtangang hepe sa Investigation and Detective Management Division sa Police Regional Office-7 mibutyag sa Banat News nga dunay 50 ka mga sundalo ug polis ang gipailawom sa lima ka adlaw nga Crime Scene Initial First Responders Course.
Matud pang Marquez ang Australian Federal Police ug PNP pinaagi sa iyang buhatan maoy nag-sponsor niini aron matudloan ang mga imbestigador kung unsay buhaton kung dunay mga pagpangatake sa mga terorista.
Ang maong pagbansaybansay himuon sulod sa lima ka adlaw ug pagkahuman niini itudlo kini sa ubang mga rehiyon.
Matud pang Marquez adunay mas dako pang susamang matang sa training nga gikatakdang paluyohan sa Malacañang nga maglambigit na sa 41 ka mga batches sa mga polis ug sundalo sa tibuok nasud.
Sumala pang Marquez giapil sa maong training ang militar aron makahibalo sila unsaon pagpreserbar sa crime scene panahon nga ilang makasangka ang mga New People’s Army ug uban pang mga rebelde.
“Kasagaran man gud sa Army ila rang kuhaon ang mga armas, unya pag-abot sa SOCO (Crime Scene Investigation Operations) guba na ang mga ebidensya,” pasabot pang Marquez.
Kagahapon midonar ang Royal Australian Federal Police og mga computer sets sa Police Regional Office-7 nga nagkantidad og dul-an usa ka milyon ka pesos. Ang mitunol niini mao ang ikaduhang labaw sa kapolisan sa Australia nga si Assistant Commissioner Steve Lancaster. (BANAT NEWS)