CEBU, Philippines - Gipasaka na sa kapolisan kagahapon ang kasong frustrated murder batok sa tulo ka suspetsado sa pagpamanhig sa duha ka mga Korean national didto sa Pacific Villa subdivision sa barangay Pajac, dakbayan sa Lapulapu sa miaging semana.
Si Senior Superintendent Rey Lyndon Lawas, director sa kapolisan sa maong dakbayan nga nahinabi sa Banat News nagkanayon nga duha sa tulo ka mga suspetsado sa maong pagpangambush nailhan nila pinaagi sa footage sa CCTV camera nga gitaud sa nahisgotang subdivision. Dugang pa niya nga nailhan usab nila ang mastermind sa maong pagpamanhig nga usa usab ka Korean national kinsa lakip usab nga gipasakaan og kaso. Nagdumili pa hinuon siya sa paghatag sa Banat News og ngalan sa maong mga suspetsado samtang padayon pa nila kining gipangita sa pagkakaron.
Si Sr. Supt. Lawas miingon nga ang panagribal sa negosyo sa mga biktima ug sa mastermind sa maong pagpamanhig maoy gitumbok nga hinungdan.
Gitataw niya ang maong mastermind nga nagpuyo sa Sugbo kapin sa napulo na ka tuig namatigayon og mga souviner nga produkto susama usab sa negosyo sa duha ka biktima nga sila si Lee Dong Gun, 46, ug Jung Ha Buk, 40, kinsa duha pa ka tuig nga nagpuyo dinhi sa Sugbo.
Kahinumdoman nga luwan ang duha ka biktima sa puti nga sakyanan gikan sa ilang gipuy-an sulod sa Pacific Villa subdivision sa barangay Pajac sa maong dakbayan dihang sa paggawas nila sa ganghaan sa maong subdivision kalit silang gipauwanan og mga bala sa wala hiilhing lalaki. Natusak sa bala ang sakyanan nga giluwanan sa duha ka biktima ug samaran usab sila sa ilang bukton nga maoy hinungdan sa ilang paghilandig sa Mactan Doctor’s Hospital sa maong dakbayan. (BANAT NEWS)