CEBU, Philippines - User ug dili pusher ang polis nga giingong nalambigit sa ilegal nga drugas diha sa dapit duol sa PNP Regional Training School sumala pa ni Cebu Provincial Police Office director Patrocinio Comendador.
Si Comendador miklarong ang maong polis nga nadestino sa Barangay Gaas, Balamban, drug user base sa mga pagpangutana sa mga sakop sa konseho sa barangay ug dili drug pusher.
Matud pang Comendador dunay upat ka police trainees ang gikatahong namalihug sa maong polis sa pagpalit og shabu.
“Mao na akong nahibaw-an bahala na kuno ang sukli basta kay makagamit ang mga trainees,” dugang pang Comendador.
Ang shabu gikatahong gikan sa Cebu City.
Ug sukwahi sa report nga dunay laing polis sa PNP Regional Training School nga nalambigit sa illegal drugs si Comendador wala makadawat ug dili makakompirmar niini.
“Dunay gisulti before nga usa taga-RTS but during interview wala man ma-confirm kato ra ang taga-outpost usa,” matud pang Comendador sa text message.
Adunay imbestigasyong himuon sa higayon nga mopirma na sa ilang mga pamahayag ang mga testigos. Sayo niini gimando ni Police Regional Office (PRO)-7 director Marcelo Garbo Jr. nga imbestigahon ang maong report.
Ang barangay kapitan sa Gaas nga si William Genel mibutyag nga usa sa iyang tanod ug usa ka sakop sa Lupong Tagapamayapa ang miangkong tiggamitan og ilegal nga drugas ug ang duha maoy mitumbok sa maong polis nga maoy nagbaligya kanila niini.
(BANAT NEWS)