CEBU, Philippines - Gihulagway ni Sr. Supt. Melvin Ramon Buenafe, hepe sa kapolisan sa siyudad sa Sugbo nga malinawon kaayo ang duha ka adlaw sa mga Santos ug patay dinhi sa dakbayan.
Matud pa ni Buenafe nga dako ang kalainan sa pagsaulog niining tuiga sa Kalag-Kalag kay sa miaging tuig.
“Ang assessment ko mas peaceful and orderly ang kalag-kalag karong tuiga. Wala ta reports of untoward incidents related sa celebration, peaceful and orderly sa mga sam-ang.” Pasabot pa ni Buenafe sa iyang gipadalang text message sa Banat News.
Gibutyag usab ni Buenafe nga mas daghan na karon og gipanaod nga CCTV camera ug mas daghan ang puwersa sa kapolisan nga gikatag-katag uban sa mga force multipliers sa sulod ug sa gawas sa mga menteryohan.
Maoy hinungdan matud pa niya nga naglisud paghuygo ang mga kriminal sa kabalaka nga dali ra silang masikop.
Matud pa ni Buenafe nga mas minus usab ang nasakmit nilang mga armas nga gidala sa sulod sa sementeryo niadtong Huwebes ug Biyernes itandi sa milabay nga tuig.
Bisan ang mga binotelyang ilimnong makahubog nihit kaayo sa Kalag-kalag ning tuiga itandi sa miaging tuig.
Sa nasayran misuroy-suroy gyud si Buenafe sa mga nagkalainlaing sam-ang ning dakbayan sulod sa duha ka adlaw nga Kalag-kalag hinungdan nga nasaksihan gayud niya ang kooperasyon sa publiko ngadto sa kapolisan sa pagpatunhay sa kalinaw ug kahusay sa palibot. (BANAT NEWS)