CEBU, Philippines - Gituohan nga may tinuod gyung ungo sa mga nagpa-ungo-ungo sa Horror Booth sa dakbayan sa Mandaue dihang pipila sa mga misulod niini mitug-an nga ang lana nga pang-alkontra sa ungo mibukal sa sulod sa booth.
Si Mimi, 32, nga taga barangay Pajak, dakbayan sa Lapulapu misumbong sa Banat News nga kadiyot ra siya sa sulod sa Horror Booth kay namatikdan niyang miawas ang iyang lana gikan sa garapa nga gisudlan niya niini nga nagpasabot nga may mga ungo gyung tinuod sa sulod sa booth.
Maoy hinungdan nga ang mga tawong gusto motan-aw sa dagway sa ungo mihugpa sa Horror Booth sa dakbayan sa Mandaue.
Kini dihang giingong gawas sa presensya sa nagpa-ungo-ungo lang, may mga tawo nga tinuod gayud nga ungo sa kinabuhi nga misalmot sa grupo nga manghadlok sa katawhan.
Gibuksan kini niadtong Oktubre 29 ug magpadayon sa pasundayag hangtud sa Nobiyembre 4, gipanid-an karon sa mga di ungo ang mga kauban nilang ungo gyud sa tinuod nga kinabuhi.
Sa miaging Nobiyembre 1 ug 2 namatikdan sa pultero sa horror booth ang paghugpa sa kagatusan ka mga tawo nga mipuno sa sulod sa tibuok compound ug mismo sa sulod sa Mandaue City Sports Complex diin ibutang ang horror booth sa sitio Tribunal nga nahimutang sa barangay Centro sa maong dakbayan.
Sa mga nanan-aw naglabi ang mga batan-on ug mga hamtong apan di kaayo daghan ang mga senior citizen sa kabalaka nga makutasan unya sila sa kakuyaw ug atakehon sa altapresyon.
Nasuta sa Banat News nga kasagarang nagdasok pagtan-aw sa mga makalilisang pasundayag sa horror booth mao ang mga molupyo nga gikan sa lungsod Cordova, dakbayan sa Lapulapu ug Sugbo, ug pipila lang ka pudyot ang taga Mandaue.
Nagkalainlain ang ilang reaksiyon dihang giinterview sila sa Banat News sa ilang pagpanggawas gikan sa horror booth.
Si Letty Jumao-as, 27, nga taga Pusok, dakbayan sa Lapulapu mibutyag nga puwerti niyang kurata dihang nasud-ong niya ang dagway sa ungo.
Matud pa niya nga wala siya makasugakod sa pagpabilin sulod sa booth tungod sa kangitngit ug kangiob niini unya mokalit lang og gawas ang mga ungo.
Samtang si Mimi, 32 , nga usa ka mahuyang miingon nga migawas siya sa pagbukal sa iyang lana sa kabalaka ug kahadlok nga bugnuon siya sa tinuod nga ungo didto sa sulod.
Sayo niini na-intriga ang ubang katawhan kay buot gyud mosil-ing sa tinuod nga dagway sa ungo apan naglisud sila pag-ila sa nagpa-ungo-ungo lang nga di ungo ug sa nagpaungo-ungo nga tinuod gyud nga ungo. (BANAT NEWS)