CEBU, Philippines - Personal nga gibisitahan kagahapon ni Police Regional Office (PRO) 7 Director Marcelo Garbo ang mga pantalan, terminal ug mga sementeryo ning siyudad sa Sugbo pagsuta kun hugot ba ang seguridad nga gipatuman sa iyang mga sakop sa kapolisan sa maong mga lugar.
Si Garbo unang mibisita sa South Bus Terminal diin siya nakadayeg niini tungod kay wala magpabaya ang tagdumala niini sa pagtuman sa mga panukdanan alang sa hingpit nga kasigurohan sa maong lugar. Nakita ni Garbo ang napulo ka CCTV Cameras nga gibutang sa sulod sa maong terminal.
Gawas niini, gipabantay usab ang mga sniffing dogs nga maoy musimhot sa mga kargamento pag-ila sa mga sulod niini nga gidiling drugas og mga eksplosibo ug uban pang kontrabando.
Tungod niini wala nay laing gitugon si Garbo sa tagdumala sa maong terminal nga ipahinumdom gyud sa mga drayber sa mga trak pasaheroan nga mopasakay sa mga pasahero sa paglikay sa overloading ug kadanghag sa pagpadagan sa ilang sakyanan.
Kini aron sa pagsiguro nga malinawon ang biyahe niini ug walay kinabuhing mausik. Samtang mibisita usab si Garbo sa North Bus Terminal, pier area ug sam-ang sa Calamba diin nasud-ong niya ang kaalerto sa mga guwardiya nga kapolisan ug nasuta niya ang kahigpit sa seguridad sa maong mga dapit sa pagpatunhay sa kalinaw ug kahusay karong adlawa ug ugma. (BANAT NEWS)