CEBU, Philippines - Ang 10 ka mga estudyante sa high school sa San Remegio National High School sa amihanang bahin sa Sugbo migama og usa ka pelikula nga naghulagway sa atong kalibotan ug may ulohan nga “Saving Mother Earth”.
Sa maong pelikula gihagatan og pagtagad ang bahin sa suliran sa basura ug ang mga proyekto bahin sa tree planting. Kining tanan may labot sa programa sa departamento sa edukasyon kalabot sa Global Connection and Exchange (GCE), diin ang nahisgutang mga estudyante maoy unang hut-ong nga bansayon ubos niining maong programa.
Sumala ni Manager Romarico Cabellon sa eCenter nga ang GCE nga programa usa ka tinambayayongang proyekto sa Philippine Community Center eCenter Network, National Computer ug International Research Board.
Miingon si Cabellon nga ang Departamento sa Edukasyon sa United States maoy mihatag og pundo sa GCE ug kini gilusad dinhi sa Pilipinas niadtong Disyembre 2011 diin mitumbok og 14 ka pilot Community eCenters sa tibook kalibotan.
Ang maong training program naglakip sa mga hilisgutanan bahin sa Global Youth Service Day (GYSD) nga naglakip usab sa mga batan-on kinsa tudloan kung unsaon pagsulbad sa Global Warming; information and communication technology; ug usab leadership training. Kun makahuman na sa maong training , ang maong mga estudyante magpadayon sa ilang pagbinayloay og kahibalo ug opinion uban sa lain pang grupo sa mga tinun-an sa US nga ipaagi sa on-line discussion sa internet
Ang “Saving Mother Earth” usa ka video sa tree planting activity sa San Remegio nga girepresentar sa mga magtutungha ngadto sa ilang kaatbang sa U.S.
Gipadayag sa maong video ang mahitungod sa solid waste management ug environmental management sa maong lungsod ug kini masud-ong na sa GCE website nga mabasa na sa tibuok kalibotan.
Ang gibansay-bansay na nga magtutudlo sa San Remegio National High School nga si Norman Fernandez maoy migiya sa mga estudyante bahin sa paggama sa maong pelikula nga “Saving Mother Earth” video. (WC)(BANAT)