CEBU, Philippines - Usa ka wala mailhing lalaking patay na nga naputos og bun-og ang kalawasan ang napalgan sa milabay’ng adlaw diha nasangit sa kilid sa bung-aw sa kalibonan ug mingaw nga lugar sa barangay Tabla, barangay Liloan.
Ang duty desk officer sa Liloan Police Station nga si SPO4 Winry Pilapil nagkanayon nga ang kapitan sa nahisgutang barangay nga si Henry Tanjay maoy mi-report sa nahisgutang hitabo niadtong Biyernes sa hapon. Matud ni Pilapil nga base sa imbestigasyon sa iyang kauban nga si SPO1 Ricardo Enriquez dunay mga bun-og sa lawas ug samad sa nawong ang maong patay’ng lalaki ug gituohang gilabay ra diha sa lugar.
Ang maong patay gibana-banang nagpanuigon gikan sa 30-35-anyos, 5’6 ang gitas-on sa barog niini, gamayon og lawas, dunay mga patik sa lawas ug diha dapit sa iyang tiyan dunay patik nga ngalan nga “Eddie.”
Ang maong patay nagsul-ob og sleeveless nga t-shirt nga kolor itom, itom nga bull cap, cargo pants ug Islander nga tsinelas.
Si Pilapil midugang nga dunay nabantayan nga kolor puti nga L300 van uban sa usa ka XRM nga motorsiklo nga kolor puwa nga kadudahang miagi diha sa lugar nga nahitaboan.
Gituohang namatay ang biktima tungod sa mga bun-og nga naangkon sa kalawasan niini, gipaabot nga kini ipailawom sa autopsy pagtino gyud sa hinungdan sa iyang kamatayon. (EIM) (BANAT)