CEBU, Philippines - Ang Bureau of Fire Protection (BFP-7) sa rehiyon 7 gitakdang mopahigayon og Out Camp karong adlawa ug ugma alang sa 120 ka mga gagmay nga anak sa mga bombero aron tudloan sila bahin sa batakang pamaagi sa pagsanta sa sunog.
Ang maong out camp adto ipahigayon sa lungsod sa Cordova nga pangunahan sa mga batid nga nagbase sa Sugbo nga adunay tukmang kaalam kalabot sa sunog.
Matud pa ni Insp. Michelle Castro, tigpamaba sa BFP-7 nga kining maong out camp maglangkob sa fire ug emergency drills, mga pamaagi bahin sa paglikay sa sunog, may mga duwa, ug uban pang makalingaw nga aktibidad aron paglingaw sa mga kabataan .
Busa matud pa ni Castro nga himoon nila kini tungod kay dali ra kaayong makakat-on ang linghod nga pangisip sa bata ug samtang malingaw sila sa mga duwa, may makat-onan pa sila bahin sa sunog.
Dugang pa niya nga sa duha ka adlaw nga kalihokan, langkoban usab og mga lektura nga ipahiuyon sa linghod nga pangisip sa kabataan nga dali ra usab nilang hisabtan.
Sumala pa ni Castro nga kining maong out camp mahinungdanon kaayo aron nga bisan mga bata pa sila may kaantigohan na bahin sa tukmang pamaagi pagsumpo ug paglikay sa sunog. Gipadayag ni Castro nga ang BFP-7 nagplanong mopahigayon usab niining maong programa ngadto sa mga bata nga nagtungha pa sa nursery ug mga grade schools sa ubang mga lalawigan sa rehiyon
Ang gitakdang mosalmot niining maong kalihokan sa Cordova mokabat sa 120 ka mga bata. (/WC) (BANAT NEWS)