CEBU, Philippines - Tulo ka mga babaye nga gidudahang sakop sa usa ka sindikato sa pagpamaligya og mga pekeng titulo sa yuta atol sa gihimong entrapment operation sa Criminal Investigation and Detection Group (CIDG)7.
Ang mga nasikop mao silang Jessica Vasquez, 48, taga Minglanilla; Rosita Villahermosa, 42; ug Amme Sacil, 40, nga pulos molupyo sa Capitol Site sa dakbayan sa Sugbo.
Usa ka Ruth Burden, nga usa ka registered nurse nga molupyo sa dalan Pelaez ning dakbayan ug may lending business ang mitaho sa CIDG kabahin sa pagpangilad kaniya sa tulo.
Sa imbestigasyon sa CIDG, si Sacil nangalyas nga Leona Ravago nga mao usab ang pangalang makita sa titulo sa yuta nga kunuhay iprenda aron lang makakuha og kwarta sa mga biktima.
Si Villahermo sa gipailaila sa usa ka higala ngadto sa biktima niadtong buwan sa Mayo ug giingong nangutang kini sa biktima og P75 mil ug gi-collateral ang usa ka sakyanan.
Apan nianang buwan sa Agosto, ang biktima gipailaila ni Villahermosa ngadto ni “Leona Ravago” kay mangutang kini og P120 mil ug i-collateral niini ang titulo sa iyang yuta.
Human mahatagi og pasiunang P43 mil si Ravago (Sacil) gipatan-aw dayon ni Burden sa Office of Register of Deeds ang titulo ug nakurat kini tungod kay peke kini hinungdan sa iyang pagpadakop sa mga suspek.
Si Sacil ug Villahermosa nasikop sa entrapment operation sa CIDG sa usa ka uptown mall sa siyudad sa Sugbo, diha lang nila nahibaw-ang duna pay kauban ang duha nga si Vasquez kinsa nagpaabot ra sa usa ka restaurant ug ilaha usab kining gidakop. Si Vasquez gitumbok nga lider sa grupo.
Ang tulo nagdumili pagtubag sa mga sakop sa media dihang gipangutana bahin sa alegasyon kanila. (BANAT NEWS)