CEBU, Philippines - Giuswag sa taga Philippine Health Insurance Corporation (PhilHealth) ang gitakdang umento sa premium sa mga miyembro nga nagbayad sa kinaugalingon ngadto sa Enero 1, 2013, gikan sa Oktubre 1, niining tuiga.
Sa sayo pa gipahibawo sa PhilHealth nga patas-an ang premium sa mga miyembro nga nagbayad sa kinaugalingon nga may kinitaang P25 mil paubos matag buwan ngadto sa P600 gikan sa P300 matag tulo ka buwan sugod unta sa Oktubre 1, ning tuiga.
Apan human sa konsultasyon nga gihimo sa nagkalainlaing sector nga misandig sa suliran bahin sa mga natural nga kalamidad nga miigo sa nasud gumikan sa baha ug lunop ug panahili sa yuta diin daghang nabiktima ilabi na sa mga dapit sa national capital region (NCR) nakahukom ang hunta direktiba sa PhilHealth sa pag-uswag sa pagpatuman niining maong umento sa bayranan sa premium ngadto sa Enero 1, 2013
Ubos sa PHIC Circular 47-2012, ang premium rate alang sa kuwarter nga gikan sa Oktubre hangtod Disyembre 2012 magpabiling P300.
Gipahinumdoman usab sa PhilHealth ang matag miyembro nga wala pa makabayad sa ikatulong kuwarter kutob niadtong Septiyembre nga mas maayong makabayad sila niining buwan sa Oktubre aron dili sila paninglan og interes o tubo sa ilang bayranan sa maong kuwarter. (WC) (BANAT NEWS)