Oktubre 9
CEBU, Philippines - 1996—Ang Amerikanong anesthesiologist ug imbentor sa tulo ka dagkong imbensyon nga gamit sa medisina nga si Robert Hingson namatay. Si Hingson maoy imbentor sa mga gamit sa pag-anesthesia sa mga pasyente aron mawagtang ang bationg kasakit atol sa mga operasyon. Una niini mao ang portable respirator anesthesia gas machine and resuscitator, nga gitawag sa mga doktor nga Western Reserve Midget, kini gamiton sa ginagmay o mubo lang nga operasyon nga nagkinahanglan og general anesthesia. Lakip sa iyang imbensyon mao ang continuous caudal anesthesia techniques alang sa mga manganak. Ug ang labing nakapabantog kaniya mao ang iyang "peace gun," nga pormang pistol nga injection nga walay dagom. Ang medisina ipasulod sa panit sa pasyente pinaagi sa jet-injection. Tungod kay dili na kinahanglang mag-ilisilis og dagom sa matag tusok mas paspas na ang pagpamakuna ilabi na sa mga sakit nga small pox, measles, tuberculosis, tetanus, leprosy, polio ug influenza.
Che Guevara
1967 – Karong adlawa gipatay ang nabantog nga rebolusyunaryong si Che Guevara. Si Guevara nagtuo sa idolohiya ni Karl Marx bahin sa rebolusyonaryong pamaagi aron mapatuman ang reporma ug ang magdumala sa panggobiyerno sa usa ka nasud mao ang mga mamumuo ug putlon ang pagdominar sa mga adunahang mao usab ang nagpadagan sa gobiyerno. Si Guevara nadakpan sa mga sundalong Bolivian samtang nag-organisa og usa ka rebolusyon sa maong nasud nga gitawag og Ejercito de Liberacion Nacional de Bolivia (ELN) o National Liberation Army of Bolivia. Ang pagpatay kang Guevara giingong gimando sa pangulo sa Bolivia nga si René Barrientos. Usa siya sa mga nakatabang nga mapalagpot ang pangulo sa kaniadto nasud sa Cuba ug napalingkod sa diktador sa Cuba nga si Fidel Castro. Si Guevara namatay sa edad nga 39-anyos, namatay siyang rebolusyonaryo. (BANAT NEWS)