CEBU, Philippines - Mibiya na sa iyang katungdanan isip chairman sa Cebu City Traffic Operations Management (CITOM) Board si kanhi Konsehal Sylvan “Jack” Jakosalem.
Kini iyang gihimo human sa pormal niya nga pagsang-at sa iyang certificate of candidacy sa miaging semana alang sa iyang paglansar pag-usab sa pagka-konsehal sa north district sa dakbayan sa Sugbo ubos sa Team Rama.
Gitataw hinuon ni Jakosalem nga magpadayon gihapon ang iyang pagka-consultant sa siyudad alang sa traffic management hangtud sa buwan sa Disyembre ning tuiga.
Apan gibutyag kagahapon ni Mayor Michael Rama nga hangtud niining tungora, wala pa gihapon siya makahukom kung kinsa ang iyang ipuli kang Jakosalem.
Nagkanayon si Rama nga kinahanglan ang lapad nga pagtuon kun kinsa gyud ang angayan nga ihulip sa katungdanan nga bakantehan ni Jakosalem.
Sa laing bahin, walay plano ang mayor nga hangyoon si kanhi konsehal Nestor Archival nga mobiya sa iyang puwesto isip head sa technical working group alang sa Bus Rail Transit (BRT) project sa siyudad sa Sugbo.
Nagpapili si Archival pag-usab pagka-konsehal ubos sa Bando Osmeña Pundok Kauswagan (BOPK).
Matud pa ni Rama nga kahibalo na si Archival sa angayan nga buhaton human sa pag-file sa COC niini sa miaging semana. (/WC) (BANAT NEWS)