CEBU, Philippines - Gitakda nga mahinayon na karong adlawa ang demolisyon sa mga puloy-anan sa 32 ka pamilya sa sitio sa Langka, sitio Mabuhay ug sitio Lubi sa Barangay Luz niining dakbayan sa Sugbo.
Sumala ni Manlalaban Collin Rosell, hepe sa Division for the Welfare of the Urban Poor (DWUP) nga andam nga mohatag og ayuda ang kagamhanan sa siyudad sa Sugbo sa mga hingtungdan sama sa pagkaon, tubig, ug magpagamit pa sila sa ilang sakyanan aron sa paghakot sa mga butang sa mg apektado ngadto sa mga dapit nga ilang balhinan. Apan matud pa ni Rosell nga nangita pa og paagi ang siyudad nga makakita og holding area sa mga hingtungdan sanglit adunay pipila niini nga wala pa’y klaro nga padulngan. Una nga gipadayag sa DWUP nga dili angayan nga papahawaon ang nahisgutang mga pamilya sanglit relocation site naman daan ang gipuy-an niini. Kahinumdoman nga wala mosugot ang konseho sa sugyot sa DWUP nga paliton lang ang maong luna aron dili mapahawa ang mga apektadong pamilya.
Ang konseho misugyot nga mas maayo nga tagaan og relocation site ang maong mga pamilya ug hatagan og financial assistance.
Nasuta nga ang rason sa pagpapahawa sa maong mga molupyo mao ang kapakyas nila sa pagbayad sa ilang obligasyon sa Community Mortgage Program.
Samtang nagkanayon si Evangeline Abejo, lider sa urban group nga sakit sa parte sa mga apektado sa demolisyon sanglit kasagaran kanila nagpuyo na sa maong dapit sukad pa niadtong 1958. (BANAT NEWS)