CEBU, Philippines - Gihangop ni Gobernador Gwendolyn Garcia ang pagkapili sa lalawigan sa Sugbo isip 2012 Most Business Friendly Local Government Unit sa tibuok nasud.
Kini human ipakanaog ang katapusang hukom didto sa Philippine Chamber of Commerce and Industry (PCCI) Plaza sa kaulohan niadtong katapusang semana sa Septiyembre ning tuiga.
Ang gibasehan sa mga hurado sa ilang desisyon mao ang pagsaka sa nagkalainlaing aspeto sa kagamhanan sa lalawigan sa Sugbo sa natad sa Trade Investments and Tourism Promotions, Public-Private Sector Partnership, MSME Development, Quality Management System and Human Resource Development Innovations ug Inter-Local Government Relations.
Sumala sa gobernador nga ang lalawigan sa Sugbo nakakab-ot sa labing maayong pasidungog nga nagkahulogan sa maayong pagdumala sa ekonomiya niini sa nagdumala sa lalawigan.
Gumikan niini gipasabot sa gobernador nga kinahanglang ang mopuli kaniya nga magdumala niining lalawigan may igong katakus usab nga ikapadayon ang kauswagan sa lalawigan sa Sugbo aron mamintenar niini ang nakab-ot niining pasidungog niining tuiga isip most business friendly local government unit.
Sa pagkakaron duha ang nagpanikad nga mokandidato sa pagka-gobernador sa lalawigan sa Sugbo nga mao sila si Kongresista Pablo John Garcia ug Hilario Davide III, diin ang mananaog mao na usab ang modumala sa renda sa pangagamhanan niining lalawigan. (BANAT NEWS)