CEBU, Philippines - Gipasalig sa Team Rama nga ilahang tabangan ang 42-anyos nga ginang nga si Marietta delos Santos kung tinud-on sa kapitan sa T. Padilla ug Association of Barangay Councils (ABC) president Michael Ralota ang bahad nga ikiha niya kini og libel.
Si Marietta maoy mipabuhagay sa balita nga gitanyagan siya ni Ralota og P200,000 aron modagan siya pagka-konsehal sa north district sa siyudad sa Sugbo nga gidudahan usab sa Team Rama nga taktika aron sabotaheon ang kandidatora sa konsehal sa Barangay Lahug nga si Mary Ann delos Santos kinsa midagan pagka-konsehal ubos sa ilang partido.
Matud pa ni delos Santos (Mary Ann) nga dunay mga abogado ang Team Rama nga motabang kang Marietta kinsa iyang gihulagway nga igo rang misulti sa kamatuoran ug karon mao pay naalaot.
Si Marietta walay trabaho ug dunay lima ka mga anak samtang gwardiya ang iyang bana ug nagpuyo sa barangay T. Padilla. Nagpasalamat si delos Santos sa maong ginang gumikan kay bisan sa kalisod sa kahimtang niini, wala gyud kini nagduha-duha sa pagbutyag sa iyang kaagi hinungdan nga naluwas gikan sa peligro ang iyang kandidatora.
Una na nga gihimakak ni Ralota ang pasangil ni Marietta ug iyang giklaro nga giimbitar ra niya ang maong ginang nga moadto sa barangay hall niadtong Oktubre 2 apan igo ra siya nangutana niini kun interesado ba kining mahimong lider sa grupo sa kababayen-an sa ilang barangay.
Gisaysay ni Ralota nga wala na siya’y plano karon nga komporontahon si Marietta sanglit iyaha nang gisangon sa iyang mga abogado ang lakang nga ilang himuon batok sa ginang.
Modagan usab pagka-konsehal si Ralota sa north district ubos sa Bando Osmeña Pundok Kauswagan.
Si Bise Mayor Joy Augustus Young mikatawa lang sa maong isyu ug miklaro nga dili makabuhat ang BOPK sa maong butang (panghaylo) apan giangkon niyang makadaot sa imahe nila ang maong pasangil. (BANAT NEWS)