CEBU, Philippines - Hayan nga dili na unya mahasol ang mga motorista sa barado nga trapiko dinhi sa Sugbo kay ma-monitor naman nila kini sa dili pa sila mosum-ok sa mga dapit maghuot ang mga sakyanan. Kini human hangyoa sa Mactan Cebu Bridge Management Board (MCBMB) ang project manager sa Japan International Cooperation Agency (JICA) nga si Director Remedios Belleza bahin sa pagsagop sa Intelligent Traffic System nga gisugyot niini.
Sumala pa ni DPWH-7 Regional Director Ador Canlas nga ang Intelligent Traffic System maoy usa sa labing bag-o nga matang sa teknolohiya diin makita sa mga motorista ang sitwasyon sa trapiko sa duha ka taytayan sa Mactan ug sa ubang mga dagkong mga kadalanan sa Metro Cebu Area.
Sigon pa ni Director Canlas nga ang mga motorista makakita ug masayud na unya sa dagan sa mga sakyanan sa mga nagkalainlaing lugar ning dakbayan pinaagi sa ilang mga I-phone, computer ug laptop.
Giklaro ni director Canlas nga ang maong teknolohiya makahatag og tukma nga higayon sa publiko pag-analisar sa sitwasyon aron pagpakanaog og desisyon kun angay ba silang mosubay ug mosum-ok sa maghuot nga mga sakyanan sa maong lugar o dili.
Gitumbok ni Canlas nga daghan na nga mga progresibong mga nasud ang naggamit sa maong teknolohiya hinungdan nga dako usab ang iyang pagtuo nga ang maong teknolohiya mahimo kaayong epektibo nga ipatuman dinhi sa lalawigan sa Sugbo. (WC) (BANAT)