CEBU, Philippines - Duha ka mga batan-on ang naangol dihang nanghasi ang usa ka hubog ug nagpataka og panunggab sulod sa diskohan sa barangay San Agustin sa lungsod sa Alcoy kagahapon sa ala 1:30 sa kaadlawon.
Ang mga biktima mao sila si Marvin Callellero, 23, ug si Ryan Arogante, hingkod, pulos ulitawo nga managsilingan sa barangay Guiwang.
Samtang ang suspek mao si Jesus Semaco, 20, ulitawo, nga taga Sitio Guinsalgan, barangay Daanlungsod, Alcoy.
Si PO2 Marivel Pardo sa Alcoy Police Station mibutyag sa Banat News nga ang mga biktima nanggawas kini sa diskohan paingon sa tindahan aron mag-uli sa basiyo sa softdrink.
Apan gisugat sila sa suspek ug gipanunggab sa walay igong hinungdan busa pulos samdan ang mga biktima
Si Callellero naigo sa bukobuko ug sa walang bahin sa abaga, samtang si Arogante samdan usab sa tiyan. Dihang misakuong sa kasakit ang duha ka biktima, misirit dayon ang suspek og dagan pahilayo sa maong lugar ug wala na hiapsi sa kapolisan.
Hinuon sa pagka alas 7:00 sa buntag kagahapon nadakpan kini pinaagi sa hot pursuit operation sa kapolisan didto sa pinuy-anan niini ug gitanggong dayon sa karsel samtang gihikay ang tukmang kaso nga ipasaka batok niya.
Atol sa pagsukit sukit sa kapulisan ang suspek mibutyag nga nalimot siya sa iyang kaugalingon tungod sa kahubog ug wala na masayod sa iyang gibuhat.
Ang mga biktima gihatod dayon ngadto sa tambalanan sa maong lungsod. (/WC) (BANAT NEWS)