CEBU, Philippines - Si Kongresista Eduardo Gullas sa unang distrito sa probinsiya sa Sugbo mibutyag kagahapon nga aprobado na ang House Bill No. 6125 sa Kongreso ug Senado.
Sa press conference didto sa University of the Visayas (UV) gipasabot ni Gullas nga ang HB No. 6125 nga mao ang “an act declaring certain parcels of land of the public domain located in the city of Naga, province of Cebu, as agricultural land upon of disposition for agricultural, residential, commercial, industrial or other productive purposes”.
Gipasabot ni Gullas nga ang tumong sa maong balaodnon mao ang reclassification ug classification sa mga yuta sa goberno ngadto sa “alienable ug disposable” o “A ug D”.
Matud sa Kongresista nga kung ang usa ka lugar timberland pa buot pasabot nga dili pa tawo ang namuyo niini busa wala pa kini titulo.
Ang legal nga gibasehan sa paggama sa maong HB mao ang Presidential Decree 1998 nga nagkanayon “authorizing the classification and/or reclassification of lands eighteen percent in slope over in the provinces of Cebu and Benguet as alienable and disposable lands”.
Gibutyag sa Kongresista nga ang maong bill dugay naaprobahan tungod kay daghan kaayo og gipangayo nga basehanan ang Senate Committee on Environment and Natural Resources. Ang maong balaodnon giduso ngadto sa Kongreso sa panahon pa ni kanhi Kongresista Jose “Dodong” Gullas sa 12th Congress niadtong tuig 2001-2004.
Ug ang maong bill giduso sa pag-usab ni Gullas sa tuig 2004-2007 ug karon sa 15th Congress naaprobahan na gyud kini. (BANAT NEWS)