CEBU, Philippines - Diriyot nang dili maila ang polis kinsa nalatayan sa Kaohsiung Bus nga gipanag-iya sa dakbayan sa Mandaue diha sa dalan MC Briones sa dakbayan sa Mandaue sa milabay’ng hapon.
Ang biktima mao si SPO1 Edison Gumpay, 42, lumad sa Surigao del Sur ug kasamtangang nagpuyo sa Bays Water Subdivision sa dakbayan sa Lapulapu.
Si PO2 Dante Flores sa Traffic Division sa MCPO mibutyag nga alas-5:45 sa milabay’ng hapon gisubay ni Gumpay ang MC Briones gikan mag-schooling sa dakbayan sa Sugbu padulong na pauli sa dakbayan sa Lapulapu.
Apan si Bernalito Pahingahug, 33, taga barangay Mambaling sa dakbayan sa Sugbo ug drayber sa siyudad sa Sugbu mihimakak nga siya ang nakaligis sa maong pulis apan kini miangkong nakabantay siyang may milagubo sa likod nga bahin sa iyang bus.
Dihang mihunong siya iyang nakita ang usa ka motorsiklo nga anaa na sa dalan ug si Gumpay 10-metros gikan sa iyang bus.
Sa pakisusi ni Flores ang helmet sa biktima nabuak ug nahiwi na ang dagway ni Gumpay hinungdan sa iyang hinanaling kamatayon.
Atol sa maong aksidente walay testigong nakasulti sa kapolisan kung unsay nahitabo nga nalatayan sa maong bus ang biktima nga niadtong tungora dunay mga nagsakay nga mga bata gikan sa Tejero Elementary School ug padung kini ngadto sa Barangay Budlaan.
Si Pahingahug anaa karon sa kustodiya sa kapolisan sa dakbayan sa Mandaue alang sa dugang imbestigasyon samtang ang kabanay sa pulis gipahibalo na sa nahitabo niini.
Sa laing aksidente, nangaangol usab ang duha ka polis apil na ang usa ka sibilyan dihang nagkabanggaay ang ilang mga gisakyan diha sa barangay Sangat sa lungsod sa San Fernando niadtong Martes sa alas 8:45 sa hapon.
Ang mga naangol mao ang nagmaneho sa motorsiklo nga si PO2 Jose Palmero, ug iyang angkas nga si PO3 Jimmy Raiz pulos taga lungsod sa Sibonga ug pulos nadestino sa Sibonga Police Station.
Samtang ang traysikol drayber nga ilang gikadinasmagay nga apil sa naangol mao si Carmelito del Rosario, taga Valencia siyudad sa Carcar. Matud ni PO2 Jose Claire Palagtiosa sa San Fernando Police Station dihang nahinabi sa Banat News ang mga polis nagmotor gikan sa Sibonga paingon unta sa siyudad sa Naga aron pagtambong sa Physical Fitness Test.
Samtang ang traysikol nga susama og direksiyon nag-una kini sa motor ug pag-abot sa maong lugar milugar kay manaog ang pasahero niini apan nasampak hinuon ang maong mga polis dihang mibalik sa agi ang traysikol human makanaog ang pasahero niini. Ang duha ka polis nangalagpot gikan sa motorsiklo samtang natagak sa traysikol ang drayber ug pulos gitabang ug gidala sa Carcar District Hospital, hinuon luwas na sila sa peligro. (BANAT NEWS)