CEBU, Philippines - Nagtibi nga misumbong sa kapolisan ang usa ka Koreano human mawagtang ang iyang Frank Muller brand nga relo de pulso nga nagkantidad og P2 milyones sulod sa usa ka Japanese Restaurant and Spa, sa dalan A.S. Fortuna sa barangay Banilad, dakbayan sa Mandaue sa miaging gabii.
Gawas sa maong relo de pulso, nahanaw usab ang iyang P20,000 cash ug i-phone nga balor og P20,000. Si SPO2 Renerio Patillas miila sa biktima nga mao si Park Hwy Chang, 55, nga temporaryong nagpuyo sa Sto. Niño Village sa barangay Banilad sa maong dakbayan.
Matud pa ni SPO2 Patillas sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan nga nahinabi sa Banat News miingon nga ang biktima misulod sa Kagura Japanese Restaurant and Spa kay nagpamasahe.
Dugang pa sa biktima nga sa pagsulod niya sa lawak, gihubo niya ang iyang sapot uban sa iyang relo de pulso nga bulawan ug adunay diamond, salapi ug i-phone. Gisulod kini sa usa ka kahon ug gitunol kaniya ang yawe, kansang duplicate nga yawe gigunitan usab sa cashier.
Si SPO2 Patillas miingon nga sa ilang imbestigasyon nasuta nga may laing kustomer nga nagpamasahe usab kinsa kalit lang nahanaw ug ilang gituohan nga maoy misakiyo sa maong butang ug padayon nila karong gipangita. (BANAT NEWS)