CEBU, Philippines - Nadakpan na sa kapulisan ang suspetsadong mitulis sa pawnshop human kini nakapusil og estudyante sa sitio Ylaya sa barangay Cogon Cruz sa siyudad sa Danao niadtong Domingo sa alas 4:37 sa hapon.
Ang biktima mao si Ricarson Roble, 21, molupyo sa maong lugar samtang ang suspek nga mipusil kaniya mao si Ricky Preto, nga usa ka habalhabal driver nga nagpuyo sa sitio Timubo, barangay Cabungahan sa samang siyudad. Si Roble mao usab ang gitumbok nga mitulis sa Cebu Pacific Gold Pawnshop sa barangay Poblacion, Danao City nga mikuha sa P9 mil alas 12:00 sa udto sa samang adlaw.
Matud ni SPO4 Edgar Gomez dihang nahinabi sa Banat News nagpahigayon og hot pursuit operation ang kapulisan human sa maong pagpanulis nakadawat sila og report nga ang suspek didto mopaingon sa maong lugar ug nakapusil og estudyante.
Ang biktima nakaangkon og lapos nga samad pinusilan sa walang paa ug gidali pagdala sa Danao City District Hospital ug luwas na sa peligro.
Wala pa matino sa kapolisan ang kinatibuk-ang detalye sa hinungdan nganong napusilan sa suspek ang estudyante apan gidudahan nga posibleng ang biktima maoy mitug-an sa presensiya sa suspek. Atol sa pagkasikop nakuhaan si Preto og usa ka kalibre .357 nga dunay upat ka buhing bala ug duha ang basiyo sulod sa tambor niini ug ang itom nga motorsiklo nga way plate number nga giingong iyang gisakyan pagtulis sa pawnshop ug itom nga bonnet. (Darrel A. Carumba ug Romeo Limpangog/EIM) (BANATNEWS)