CEBU, Philippines - Malampuson ang unang adlaw sa Suroysuroy Sugbo Northern Escapade nga gisalmotan sa 300 ka mga local ug langyaw nga turista sakay sa 5 ka mga tourist bus sa miaging adlaw.
Sayo nga migikan sa Kapitolyo sa lalawigan sa Sugbo ang nahisgutang mga sakyanan nga misuroy sa nagkadaiyang kalungsoran sa amihanan nga bahin sa lalawigan.
Sa pagsulod sa Consolacion, gipakita na sa mga Sugboanon ang talagsaong pagkamaabi-abihon ngadto sa mga turista ug midalit kanila sa lamiang pagkaon ug mga maanindot nga presentasyon sa natad sa sayaw ug kanta.
Sunod nga gihapit sa mga mikuyog sa Suroy- Suroy Sugbo ang lungsod sa Compostela ug mga lamian gihapong pagkaon ang gidalit niini ngadto sa mga turista.
Mas misamot kamabulokon ang nahisgutang kalihukan sa pag-abot ni Governor Gwendolyn Garcia kinsa mokandidato sa pagka-kongresista sa ika-tulong distrito sa lalawigan sa Sugbo.
Human sa siyudad sa Danao midiritso ang mga turista sa lungsod sa Carmen diin sila maniudto.
Si Dianne Copeland nga gikan pa sa Australia ug nakabisita sa Sugbo sa unang higayon nakadayeg kaayo sa maong programa nga Suroy-Suroy Sugbo Northern Escapade. Unya miadto na usab ang mga turista sa Alegre Beach Resort sa lungsod sa Sogod diin gisugat sila og banda uban ang local nga sayaw nga milingaw sa mga bisita.
Gikan sa Sogod miadto sa Daanbantayan ang mga turista diin gisugat na usab sila sa top three performer sa duha ka kategoriya sa Haladaya Festival nga nakalingaw kaayo kanila.
Gitapos ang unang adlaw sa Suroy-Suroy Sugbo Northern Escapade sa lungsod sa Medellin diin gidalit ngadto sa mga turista sa ilang panihapon ang lamiang pagkaon ug pagkahuman sa panihapon gisunod dayon ang fireworks display nga nakalingaw kaayo sa mga turista. WC (BANATNEWS)