CEBU, Philippines - Usa ka Korean national ang midangop sa kapolisan sa Casuntingan Police Station human siya gitulis sa mismong drayber sa taxi nga duna diay kauban sa sulod sa sakyanan nga iyang gipara niadtong Miyerkules sa kaadlawon diha sa may Herman Cortes Street sa barangay Subangdaku.
Hee Min Ahn,18, usa ka Korean national nga kasamtangan manimuyo diha sa Cherry Pink Apartelle sa barangay Casuntingan midangop sa kapolisan human sa hitabo.
Matud pa sa biktima misakay siya sa usa ka taxi gikan sa Barangay Mabolo dakbyan sa Sugbo padulong na unta sa iyang giabangang apartment. Nakuha pa sa biktima ang plaka sa taksi nga mao ang GXC-186,apan sa dihang mosakay na unta siya sa luyong bahin, naka-lock kini hinungdan nga didto na lamang siya mitupad sa drayber sa front seat.
Apan paghiabot nila sa Hernan Cortes Street sa barangay Subangdaku, kalit lamang nga dunay tawo sa luyong bahin nga misulti kaniya og tulis ug dayon kuha sa iyang Android nga cellphone nga nagkantidad og P50 mil ug ang iyang pitaka ug bag nga adunay mga importanteng dokumento.
Human makuha ang nahisgutang butang kalit mikanaog sa taksi ang maong tulisan ug gihatod siya sa taxi driver sa ilang apartment. Dako ang iyang pagtuong managkunsabo ang tulisan ug ang drayber.
Si Casuntingan police chief, Insp. Jimmy Fortes nagkanayon nga sa ilang follow-up na trace nila nga ang maong plate number nga nakuha sa biktima ug giimbitar nila ang driver niini ngadto sa police station.
Apan sa pag-abot sa biktima wala kini gitudlo sa biktima sanglit giingong dili kini ang nagmaneho sa taksi nga iyang nasakyan ug nasuta usab nga di mao ang taksi nga iyang nasakyan sanglit ang meterboard niadtong taxi nga iyang nasakyan naa sa taas nga bahin samtang ang gi-pick-up nga taksi sa mga polis anaa sa ubos ang taxi meter niini.
Si Fortes nagtuong migamit og pekeng plaka ang taksi nga nasakyan sa biktima.
Samtang sa ilang bahin usa ka driver sa delivery truck ang gitulis usab niadtong Miyerkules sa hapon samtang nangolekta kini sa iyang mga kliyente diha gihapon sa may Hernan Cortes street.
Si Julius Sosusco,39, driver sa M.C Poultry Farms ang nanukot sa ilang mga kliyente diha sa may Hernan Cortes street niadtong Miyerkules sa hapon apan kalit lamang nga dunay duha ka mga lalaking nagsakay og motor nga mihunong sa iyang luyo.
Ang backrider kalit nga mition og.38 kalibre ug dayon deklarar og tulis ug gikuha iyang kinolekta nga P3,800 ug pitakang adunay sulod nga importante mga papeles ug dayon biya sa maong dapit. (BANAT NEWS)