CEBU, Philippines - Nagtingkagol sa karsel ang usa ka 52-anyos nga lalaki human kini pasanginling nagpaugay sa iyang kinatawo sa duha ka tuig nga batang babaye nga anak sa ilang silingan sa usa sa mga barangay sa dakbayan sa Talisay niadtong Domingo sa hapon.
Sa imbestigasyon ni PO2 Violeta Godinez sa Women and Children Protection Desk sa Talisay City Police Station nasuta nga sa wala pa ang maong hitabo ang inahan sa bata migawas sa ilang balay kay nagpalit og sud-an, busa gibiyaan niini ang iyang anak kinsa nanumbay diay ngadto sa balay sa suspetsado kansang ngalan gipugngan sa Banat News.
Apan matud pa ni PO2 Godinez nga may duha ka menor de edad nga mga silingan sa suspetsado kinsa maoy nakakita nga gipaugay kuno niini ang iyang kinatawo sa maong bata.
Pag-abot sa inahan diha-diha misumbong dayon ang duha ka menor de edad sa ilang nakita sa gihimo sa suspetsado sa anak niini nga maoy nakapaaghat sa inahan sa pagsumbong ngadto sa ilang kapitan sa barangay.
Ang mga tanod nga sila si Luciano Benitiz Jr., Arturo Daan ug Dominic Baguio maoy misikop sa suspetsado ug ila usab dayon kining gitugyan ngadto sa kapolisan.
Matud pa ni PO2 Godinez nga napasakaan na nila og kasong paglapas sa Akta Republika 7610 kon “Special Protection of Children Against Abuse, Exploitation and Discrimination Act" ang nahisgutang suspek. (BANAT NEWS)