CEBU, Philippines - Usa ka 55-anyos nga mag-uuma ang nakit-ang patay nga nagbuy-od daplin sa dalan nga nasunog ang kalawasan ug gituohang naigo sa kilat didto sa bukirang bahin sa barangay Dungga sa siyudad sa Danao sa miaging Lunes sa buntag.
Ang biktima nailhan nga si Paulino Ron Jr., 55 , minyo, usa ka mag-uuma ug nagpuyo sa maong lugar.
Ang unang nakakita sa patay’ng lawas ni Ron mao si Eddie Perez, hingkod, nga silingan sa biktima.
Si PO2 Roselo Campo sa Danao City Police Station mibutyag sa Banat News nga ang lawas sa biktima lagom na kaayo nga may mga hilos busa gitaho dayon nila sa kapolisan.
Si PO2 Campo mibutyag nga atol sa pasiunang imbistigasyon nasuta nga ang mga paso ug mga lagom sa lawas niini gituohang agi sa kilat nga maoy nakaingon sa iyang kamatayon.
Midugang si PO2 Campo nga ang mga liti o kilat sa milabay’ng mga adlaw duyog sa kusog kaayong bundak sa uwan sa maong lungsod maoy gituohang nakapatay sa biktima. Ang mga silingan sa biktima mibutyag sa kapolisan nga katapusan nilang nakita si Ron niadtong Biyernes nga nanguha og uhong para sud-an ug sukad niadto wala na nila kini makita. Ang imbestigasyon sa kapolisan nagsalikway sa posibilidad nga dunay foul play ang kamatayon sa biktima. (Darrel A. Carumba ug Romeo Limpangog/WC) (BANAT NEWS)