CEBU, Philippines - Kumpleto na ang line-up sa Liberal Party ( LP) sa segundo distrito sa lalawigan sa Sugbo nga maoy mosakbang sa One Cebu Party ni Governor Gwendolyn Garcia sa eleksiyon sunod tuig.
Si kanhi Dumanjug Mayor Cesar Baricuatro mibutyag sa Bantay Radyo nga si bokal Wilfredo Caminero ang ilang gipaluyohang kandidato pagka -kongresista nga maoy i-atbang ni Kongresista Pablo Garcia.
Dugang pa ni Baricuatro nga ang iyang anak nga si Dumanjug Vice Mayor Cris Dong Baricuatro maoy mohulip ni Cameniro sa pagka-board member sa 2nd district pares ni Bokal Peter John Calderon.
Matud ni Baricuatro nga siya maoy unang gitanyagan sa pagka-board member apan mibalibad siya tungod kay gusto siyang mobalik pagka- mayor sa Dumanjug atbang ni Mayor Nelson Garcia hinungdan nga gitanyagan ang iyang anak nga bise mayor nga maoy mag-board member.
Dugang ni Baricuatro nga sa pagkakaron si LP gobernatorial bet Helario “Junjun” Davide III ug runningmate nga si Vice Governor Agnes Magpale padayon pa nga miplantsa sa final list sa mga kandidato sa LP sa tanang distrito ug kalungsoran sa Sugbo aron makompleto kini sa sunod semana.
Dugang ni Baricuatro nga sa sunod semana aduna pay laing pipila ka mayor gikan sa One Cebu ang gipaabot nga motapon sa LP apan wala siya motug-an sa mga ngalan niini.
Si Baricuatro, Cordova Mayor Adelino Sitoy ug Barili Mayor Teresito Ondo Mariñas pulos kanhi sakop sa One Cebu mitapon na sa LP atol sa mass oathtaking niadtong Sabado didto sa Sacred Heart Center uban sa tanang mga incumbent mayor sa lungsod sa Boljoon ug Santander nga giilang mga balwarte sa One Cebu.( /WC) (BANAT NEWS)