CEBU, Philippines - Nabulit sa samad tinigbasan ang lawas sa 19 anyos, nga lalaki human kini tigbasa sa iyang maguwang didto sa barangay Puente, sa lungsod sa Carmen sa miaging Sabado sa gabii.
Ang biktima mao si Jely Morales 19, ulitawo, samtang ang maguwang niya nga si Ramene Morales, 20, minyo, nga molupyo usab sa maong lugar maoy suspek.
Si PO2 Jezrhel Into sa Carmen Police Station mibutyag sa Banat News nga ang biktima ug ang suspek nag-inom og tuba sa usa ka tindahan sa maong dapit sa wala pa ang maong hitabo.
Unya dihang nangalasbag na namauli ang duha dihang nagkalalis sila samtang naglakaw sa dalan nga misangko sa paghinagitay.
Gumikan sa mandar sa alak, puwerting sukoa sa maguwang dayon milanit sa iyang sundang ug gihapsan ang walang bahin sa abaga sa biktima busa natabas kini.
Gisundan pa og dugang mga tigbas apan nakasagang ang biktima busa samdan usab ang tuo ug wala niyang bukton.
Dihang misirit na ang daghang dugo miundang og panigbas ang suspetsado ug gibiyaan ang biktima ug ang mga nakasaksi maoy mihatod sa biktima ngadto sa Danao City District Hospital.
Padayon pang gipangita sa kapolisan ang suspetsado samtang giandam na usab sa ilang kabanay ang kiha nga ipasaka batok sa suspetsado. (/WC) (BANATNEWS)