CEBU, Philippines - Si Gobernador Gwendolyn Garcia mibutyag nga ang kagamhanan sa lalawigan mang-apud-apod og 100 ka multicab ug 12 ka ambulansiya ngadto sa kalungsoran ug mga dakbayan sa lalawigan sa Sugbo sa dili pa matapos ang iyang termino
Sumala pa sa gobernador nga ang multicab mobalor og P11.4 milyones ang tanan ug gitakdang ipanghatag ngadto sa kalungsoran ug mga siyudad sa dili pa matapos kining tuiga.
Ang tumong niini matud pa sa gobernador nga aron may magamit ang mga molupyo nga kasakyan sa panahon sa mga emerhensya sama sa mga hitabo nga may dad-onon sa hospital o kaha hakutonon sa panahon sa mga katalagman
Gituyo sa gobernador ang mga multicab tungod kay gawas nga makasulod sa sigpit nga mga karsada ug hilit nga mga dapit, daginot usab og gasoline kay gamay-gamay ra man og makina.
Sa record sa provincial general services office, nasuta nga anaa na ang 50 ka mga multicab ug gipaabot pa ang laing 50 ka unit niini.
Sa samang higayon gawas sa 100 ka mga multicab, may 12 usab ka trak sa ambulansiya nga kaubang ipanghatag ngadto sa mga kalungsoran nga wala pa niini.
Hinuon wala pa ikabutyag sa buhatan sa gobernador ang mga ngalan sa lungsod ug siyudad nga hatdan ning maong mga sakyanan. (/WC) (BANAT NEWS)