Septiyembre 10
Pamantalaan sa mga Kano
1898 — Unang migawas ang publikasyon sa labing unang Amerikanong pamantalaan dinhi sa Pilipinas nga gitawag og The American Soldier.
Free Willy
1998 – Ang gimahal sa mga batang nakakita sa pelikulang “Free Willy” niadtong 1993 nga gipanganlan og Keiko nga usa ka Orca o Killer Whale gibalik na sa dapit diin kini madakpi niadtong 1979 sa kadagatan sa Iceland. Tuyo unta sa mga eskperto nga mahibaw-an kung mabuhi pa gihapon kini og balik sa natural niyang kalibutan, ang lapad nga kadagatan ug dili sa sulod sa usa ka higanteng aquarium o ocean park. Tungod sa kadako nga kinahanglanong pundo, ang Warner Brothers Studio ug si Craig McCaw mitukod sa Free Will Keiko Foundation aron masuportahan ang planong pagpabalik kang Keiko sa dagat. Liboang mga bata ang mipadala og sensilyo ug ubang sektor ang midonar og kwarta alang sa maong katuyoan hinungdan nga niadtong Septiyembre 10, 1998 gisugdan ang pormal nga pagtudlo kaniya sa paglangoy sa dagat ug ang pagtudlo kaniyang manakop og pagkaon sa iyang kaugalingong kusog. Si Keiko adunay gibug-atong 3500 kg (7720 pounds) maong gikarga kini sa usa ka Globemaster heavy transport sa US Air Force padulong sa Iceland niadtong 1996. Hulyo 11, 2002 atol sa usa sa mga leksyon ni Keiko sa kadagatan milangoy kini sa lawod ug wala na mobalik, subli kining nasigpatan bulan sa Septiyembre sa samang tuig sa kadagatan sa nasud sa Norway kapin 1,000 milya gikan sa Iceland. Niadtong 2003 nakit-an si Keiko sa baybayon sa Norwegian Fjord sa Norway apan patay na. Sa gihimong awtopsiya, pneumonia ang gikamatyan niini ug gituohang wala gyud siya makat-on sa natural nga pamaagi sa mga Orca aron mabuhi.