CEBU, Philippines - Nadakpan sa kapolisan ang gitumbok nga supplier og marijuana sa mga tinun-an sa high school sa lungsod sa Dumanjug didto sa Plaza sa barangay Poblacion sa maong lungsod alas 7:50 kagahapon sa buntag.
Ang suspetsado kinsa nasakmitan og 30 ka linikit nga marijuana mao si Esmeraldo Requina, 29, ulitawo, usa ka mag-uuma ug nagpuyo sa barangay Patong, lungsod sa Badian. Giingong ang maong mga marijuana alang unta sa suki niyang mga estudyante sa high school sa maong lungsod. Atol sa maong buy-bust operation nasakmitan usab ang suspetsado og P 200 nga marked money.
Si PO3 Dionisio Tagopa sa Dumanjug Police Station mibutyag sa Banat News nga ang suspek nabaniog na kaayo nga maoy tinubdan sa mga baligya nga marijuana nga linikit ngadto sa mga tinun-an sa high school sa maong lungsod. Gitumbok usab sa kapolisan nga ang maong suspek maoy nag-supply og marijuana sa duha ka tinun-an kinsa nadakpan sa checkpoint sa kapolisan ug nasakmitan og 60 ka linikit nga marijuana niadtong miaging adlaw.
Matud ni PO3 Tagopa nga usa ka nagpailang concerned citizen maoy mipahibawo sa kapolisan nga ang suspek didto sa Plaza sa maong higayon nga nagpaabot sa iyang mga suki nga estudyante.
Apan wala kini makabantay dihang milusad og buy-bust operation ang kapolisan nga migamit og asset nga maoy mikontak sa suspek pinaagi sa cellphone.
Milansis ang police asset nga mopalit og lima ka stick nga marijuana sa kantidad nga P100. Dihang gitunol na sa asset ang P200 nga bayad, gitunol usab dayon sa suspek ang mga linikit nga marijuana niini.
Busa gisignit dayon kini sa kapolisan ug wala na makalugnot kay ila man dayon kining nakorner. Ang suspek gitanggong na karon sa karsel ug gihikay na ang tukmang sumbong nga ipasaka batok kaniya karong buntag. (BANAT NEWS)