CEBU, Philippines – Apektado na dili lang agianan kondili apil na ang suplay sa tubig sa mga residente sa barangay Camp 4 ug mga kasikbit nga barangay sa dakbayan sa Talisay tungod sa nagsunod nga pagdahili sa yuta.
Ang naapektahan mao ang Camp 4 ug Camp 5 sukad nga midahili ang yuta niadto pang Lunes sa kaadlawon.
Aron makaagi pagbalik ang mga sakyanan gikabkab ang kilid sa bukid paingon ngadto sa dakbayan sa Toledo.
Niadtong Miyerkules pasado alas 3:00 sa hapon laing pagdahili sa yuta na usab ang nahitabo diha sa maong barangay ug midahili usab ang Camp 5 diin mga alas 4:00 sa hapon kagahapon nasuta sa Banat News nga padayon pa gihapon ang paghawan sa karsada.
Nabalaka si Kapitan Luciano Cabingatan Jr., nga dili unya makabakwit ang mga residente kung molapaw ang tubig sa sapa sa sitio Kalubangan tungod sa nasiradong dalan.
Sa laing bahin, sukad niadtong Miyerkules wala nay agas ang mga gripo sa ubang mga residente diha sa Camp 4 tungod kay naputol ang tubo sa tubig dihang midahili ang yuta.
Ang Mines Geosciences Bureau (MGB) mihagit sa lokal nga kagamhanan sa dakbayan sa Talisay sa pag-implementar sa ilang rekomendasyon kaniadto sa pagpabakwit sa mga residente sa lugar. Si Eddie Llamedo sa Public Information Officer sa MGB nga nahinabi sa Banat News nagkanayon nga sa ilang geo-hazard assessment niadtong tuig 2009 nasuta nga ang Camp 4 landslide prone area gyud kay bakilid ug anapog ang yuta ug peligro kung sige ang pag-ulan. (EIM) BANAT SPORTS