CEBU, Philippines – Ipadala sa Department for Veterinary Medicine and Fisheries (DVMF) karong Septiyembre 10 ngadto sa Tropical Medicine (RITM) sa Alabang, Muntinlupa ang Philippine Cobra nga nakapaak sa zookeeper sa dakbayan sa Sugbo sa miaging buwan. Nagkanayon si Dr. Alice Utlang ang pangulo nga importante kaayo nga dalhon sa maong sentro ang cobra aron maatiman ug magamit usab kini sa mga pagtoon.
Dugang pa niya nga dili gyud magdugay ang maong cobra diha sa Cebu City Zoo gumikan kay kinahanglan kini og pares. Matud pa niya nga mapahimuslan usab sa RITM ang maong cobra aron madugangan pa ang mga pagtoon aron makabaton og medisinang anti-venom ang mga eksperto. Kahinumdoman nga napaakan sa maong kobra ang zookeeper sa Cebu City Zoo nga si Ronaldo Aventurado ug naluwas lang dihang gikuhaan og anti-venom gikan sa Camiguin.
Dugang pa niya nga bisan mawala na ang maong kobra sa hurisdiksyon sa dakbayan, padayon gihapon ang iyang proposal nga mo-request og mga supply sa anti-venom aron duna’y magamit ang siyudad panahon sa emerhensya partikular na kung dunay mapaakan og bitin. (EIM) BANAT NEWS