CEBU, Philippines - Usa sa duha ka hubog nga taga dakbayan sa Talisay nahiagom sa hinanaling kamatayon samtang ang usa anaa sa talandugong kahimtang gumikan sa pagkabunal sa ulo sa pansayan samtang ang usa napusilan usab sa Poblacion, sa maong dakbayan sa miaging adlaw.
Ang namatay mao si Nicanor Cordova, hingkod samtang ang anaa sa kritikal nga kahimtang mao si Ronwil Omaña, 29, pulos taga Poblacion, Talisay
Si SPO1 Mike Espina ug PO2 Stephen Sefuesca mibutyag sa Banat News nga si Cordova hubog kaayo gikan nga nakig-inom sa iyang mga higala ug napalgan na lang sa iyang pamilya nga wala nay kinabuhi sulod sa pansayan niadtong Huwebes sa kaadlawon.
Gituohan sa kapolisan nga giatake sa altapression ang biktima ug pagkatumba niini nabunal ang ulo sa sawog sa pansayan hinungdan nga nabugtoan deretso sa iyang kinabuhi.
Samtang si Omaña lasbag usab kaayo nga miunay og kulata sa iyang kainom nga nailhan lang sa ngalang Insik, hingkod, nga taga barangay Dumlog, Talisay didto sa balay ni Stanley Flores.
Matud pa ni SPO1 Espina nga dala tingale sa kalipong sa bino nga gilala sa biktima nagpasingit na lang kini og estorya nga misangpot sa iyang pagpanumbag sa suspetsado.
Ang suspetsado nga nagtangkil og armas wala makapugong sa kaugalingon giluthang ang kilid sa biktima.
Gihatud dayon kini ngadto sa Vicente Sotto Memorial Medical Center human ikakonsulta didto sa Talisay City District Hospital. Gipangita pa karon sa kapolisan ang suspetsado kinsa nakasibat dayon human sa hitabo. (/WC)