CEBU, Philippines - Naglaraw ang siyudad sa Sugbo nga palambuon ang serbisyo sa North Bus Terminal ug migahin og P300,000 alang sa himuong pagtuon kung unsay gikinahanglang buhaton aron mapalambo ang serbisyo niini sa mga sumasakay.
Ang mga kadagkoan sa maong terminal mikuha sa serbisyo ni Engr. Pedro Compendio isip technical consultant aron maoy mohimo sa pagtoon. Samtang ang City Administrator nga si Atty. Jose Marie Poblete mipadayag nga nagkalapad na karon ang sektor sa transportasyon busa gikinahanglan na gyud nga mapun-an pa ang mga serbisyo sa maong terminal.
Pinaagi sa pagtoon ug mapalambo ang serbisyo sa terminal gipaabot nga makahimo og dinaliang aksyon ang CNBT Management Advisory Board atol sa peak season nga diin magbaha ang mga tawo sa terminal.
Ang maong terminal gidumala sa pagkakaron sa Cebu Provincial Bus Operators Multipurpose Cooperative nga nag-abang sa maong pasilidad.
Pipila sa mga gipangitaan og solusyon mao ang saktong espasyo alang sa mga bus, rota sa trapiko ug uban pa. Gipanglantawan usab nga mosaka pa ang income sa maong terminal ini unya og mapalambo na ang maong terminal.
Nasayran nga moabot sa 250 ngadto sa 300 ka mga bus ang mobiyahe panahon sa peak season. ( /EIM) - BANAT NEWS