CEBU, Philippines - Mipadayag sa iyang kahinangop ang hepe sa Talisay City Police Station nga si Superintendent Eddie Recamara human ang konseho sa siyudad niadtong Martes mipalabang og resolusyon sa pagpasidungog kanila isip napiling best component city police station. Apan matud pang Recamara ilahang gikinahanglan ang dugang sakyanan aron mas mapalambo pa nila ang ilang serbisyo sanglit duha ra ka mga sakyanan ang ilang gigamit pagbantay sa 22 ka barangay sa Talisay.
Matud niya nga kun madugangan lang og duha ka buok ang ilang sakyanan paningkamuton pa gyud nilang mapalig-on pa gyud ang pagmentenar sa kahapsay ug kalinaw sa Talisay.
Gibutyag sa hepe nga dunay mga higayon nga ang iyang operatiba manakay na lang og taksi kung dunay mga follow-up operations ug samtang siya kung dunay tambongang conference ngadto sa dakbayan sa Sugbo mo-hitch na lang siya sa patrol car sa Minglanilla Police Station ug lakip na sa iyang pagbalik sa Talisay.
Gipasabot sa hepe nga dili siya mogamit sa ilang mga patrolcar tungod kay mas gamit kini sa iyang mga sakop matag adlaw. ( /EIM) - BANAT NEWS