CEBU, Philippines - Naaprobahan sa konseho sa Talisay nga matag usa sa 22 ka barangay niini bisitahan og doktor matag buwan.
Kini human sa usa ka oras nga lantugi sa mga konsehal sa maong resolusyon nga gipalabang ni Konsehal Val Ylanan sa oposisyon kagahapon sa buntag atol sa regular session sa konseho sa Talisay.
Ang maong resolusyon Numero 2012-29-5 naghangyo kang Mayor Socrates Fernandez nga ang city health office nga gipangulohan ni Dr. Lino Alanzado unta mopadala og doktor nga mobisita ngadto sa 22 ka barangay sa Talisay matag-buwan.
Apan si majority floor leader Rodi Cabigas mipadayag kang Ylanan sa set-up sa Rural Health Unit (RHU) diin gi-cluster kini ngadto sa tulo ug adunay mga doktor nga nangulo sa matag grupo.
Si Konsehal Edward Alesna usab nagkanayon nga dili mahimo nga matag barangay butangan og tagsa ka doktor base sa iyang nabasahan sa balita sa pamantalaan.
Apan si Ylanan mipasabot nga ang iyang resolusyon naghangyo lang kini nga kun mahimo aduna untay doktor nga mobisita matag buwan sa kabarangayan ilabi na niining pagpunay karon og uwan-uwan tungod kay delikado nga adunay mabiktima sa dengue.
Si Ylanan miingon sa iyang kaubanan sa konseho nga ang iyang giduso nga resolusyon maoy angayang basehan ug dili ang nabalitaan sa pamantalaan.
Si Bise Mayor Alan Bucao mipahimangno sa iyang mga kauban sa konseho nga magbantay sa ilang ipanulti ngadto sa mga sakop sa media tungod kay kung unsay mogawas sa ilang baba mao usab kini ang mogawas sa balita.
Apan si Ylanan mihangyo nga bahinon na lang ang house alang sa botasyon sa pagkuwenta kun kinsay pabor ug supak sa maong resolusyon. Apan wala bahina ang konseho kay naaprobahan ang maong resolusyon ubos sa mass motion human sa usa ka oras nga lantugi. ( /WC) - BANAT NEWS