CEBU, Philippines - Gitunol na kagahapon sa kagamhanan sa siyudad sa Sugbo ang pasidungog ngadto sa tulo ka mga polis nga nakig-engkwentro sa mga tulisan sa armored car nga nahitabo sa usa ka mall sa siyudad sa Sugbo.
Si Mayor Michael Rama ug ang mga sakop sa Police Coordinating and Advisory Council maoy misaksi sa pagpasidungog sa tulo ka mga polis nga naglangkob nila ni PO2 Elrich Jourdin Catacutan, PO1 Roy Ceniza ug PO1 Ernesto Silva.
Ang maong mga polis nakadawat sa cash reward nga mokabat sa P50,000 matag usa kanila agi og katumanan sa gisaad kaniadto sa mayor.
Kahinumdoman nga nangaangol ang tulo human makigpinusilay kanila ang giingong mga sakop sa usa ka robbery group nga gipangulohan ni Junjun Cabando.
Nasayran nga ang grupo ni Cabando mitulis sa armored van nga gisakyan sa kahera sa bangko nga nagdala sa P1.2 milyones alang unta sa money changer sa sulod sa nahisgutang mall.
Misaysay si Ceniza sa Banat News nga magpabilin siya nga loyal sa iyang trabaho busa bukas gihapon siya sa mga posibilidad nga andam makigpinusilay batok sa mga dautang elemento kung adunay emerhensya. Dugang pa niya nga bisan naangol siya kaniadto, wala gihapon siya motagam sanglit kabahin man kini sa iyang trabaho.
Gawas sa P50,000 matag usa kanila, makadawat usab ang Cebu City Police Office og P200,000 alang sa nagkadaiya nila nga proyekto.
Samtang si Senior Supt. Melvin Ramon Buenafe misaysay nga dakong garbo sa ilang unit ang maong pasidungog kay kini nagpakita nga wala sila’y giatrasan bisan kung nag-atubang na sa dakong risgo ang ilang kinabuhi. (/WC) - BANAT NEWS