CEBU, Philippines - Maayong pagkabuslot sa tampihak sa usa ka trabahante human kini gipusil sa wala mailhing tawo pasado alas-5 sa kaadlawon kagahapon diha sa usa ka videokihan nga nahimutang sa barangay Kamagayan, siyudad sa Sugbo.
Ang biktima nailhang si Antonio Villacorta, 47, usa ka kargador ug molupyo sa maong lugar kinsa uban nila ni Joel Bacus ug Dennis Ruyos nanganta sa Lolys Videoke and Store sa maong lugar.
Apan kalit lang nga mipatim-aw ang usa ka wala mailhing tawo nga miduol sa biktima ug sa walay igong hinungdan gipusil ang biktima.
Human sa maong panghitabo dali gilayon nga misibat ang mamumuno samtang ang biktima dali usab kini nga gidala sa Cebu City Medical Center. Matud pa sa hepe sa kapolisan sa Homicide Section sa Cebu City Police Office Chief Insp. Jul Momahammad Jamiri nga posibleng natripingan lang gyud ang biktima apan wala nila gisalikway nga dunay laing motibo sa pagpatay. ( /EIM) - BANAT NEWS