CEBU, Philippines - Ang hapit na matukod nga Regional Training School (RTS)7 sa Philippine Public Safety College (PPSC) ang training center sa mga sakop sa Philippine National Police (PNP) sa Consolacion, Cebu mas haom nga tawgon sa ngalan ni Gen. Isagani V. Campo, ang unang Sugboanon nga heneral, sumala pa ni manlalaban Clarence Paul Oaminal.
Matud pa niya nga ang ngalan ni Gen. Campo baniog na kaayo niadtong mga tuig 1950 ug sa sayong bahin sa 1960 dihang siya pa maoy hepe sa Philippine Constabulary (PC). Gibutyag ni Oaminal nga usa sa mga kaso nga nasulbad personal ni Gen. Campo kaniadto mao ang pagpusil patay kang manlalaban Antonio Abad Tormis niadtong Hulyo 3, 1963.
Ang utok sa maong pagpatay nailhan dayon uban sa mihimo sa maong krimen ug human sila kapasakai og kaso sa korte, nakonbikto ang maong mga kriminal gumikan sa maayo kaayong trabaho sa kapolisan.
Si Campo, natawo sa lungsod sa Talisay (nga karon siyudad na) niadtong 1906. Matud pa ni Oaminal nga sa wala pa si Campo moentra sa Philippine Constabulary Academy (PCA) nga sa pagkakaron Philippine Military Academy (PMA) na, nagtudlo siya sa usa ka tunghaang publiko sa Talisay.
Migraduwar siya sa PMA kaniadtong 1932 ug nakasugat dayon siya og kombati didto sa Sulu, Davao, ug Zamboanga batok sa mga bandido ug mga rebelde. Gisubay ni Oaminal nga kaniadtong 1940-1941 nagtudlo na usab siya sa Philippine Military Academy. Nakasilbi siya isip Deputy Chief of Staff sa inila na kaayo nga si Gen. Vicente Lim ug nahimo siyang kaabag sa pagpanalipod sa Bataan.
Nasayran gikan kang Oaminal nga si Campo usa sa mga nabuhi sa Bataan Death March ug sa Capas Concentration Camp.Human sa gubat iyang gitukod pag-usab ang PC ug siya maoy nangulo sa 1st Battalion sa Panay. Siya maoy commandant sa Philippine Constabulary School, nga susama niining police training school karon.
Dugang subay ni Oaminal nga kaniadtong 1958 na-promote si Campo ug nahimong Brigadier General unya nahimong hepe sa PC. Alang kang Oaminal nga dako kaayong garbo ni Campo isip unang Sugboanon nga nahimong heneral.
Apan miingon si Oaminal nga subo kaayong palandungon nga ang bag-ong mga henerasyon wala na makaila kang Campo.
Daghang miingon nga angayang tawgon ang training school sa ngalan ni Kalihim Jesse Robredo. Si Oaminal nagkanayon nga kun ang Naga City mihatag og pasidungog kang kalihim Robredo sa nagkalainlaing paagi, ang taga Sugbo usab mapasigarbuhong mopasidungog sa kaugalingon niining nabantog nga usa ka magtutudlo sa tulunghaang publiko, magtutudlo sa mga kabataan ug sa mga polis ug maoy unang Sugboanon nga heneral. - BANAT NEWS