CEBU, Philippines - Nalandig sa tambalanan ang usa ka 36-anyos nga babayeng kawani sa Land Transportation Office-7 human kini kulataha ug gitigbas sa iyang uyab kagahapon sayo sa buntag samtang sila nag-date diha sa Mountain View Nature’s Park sa barangay Busay, dakbayan sa Sugbo tungod sa selos.
Si PO2 Alan Caumeran sa Motorcycle Response Unit sa Cebu City Police Office (CCPO) mibutyag nga ang insidente nahitabo mga alas 6:00 sa buntag kagahapon.
Ang manag-uyab uban sa laing mga higala nag-overnight diha sa lugar pinaagi sa pag-inom ug kantakanta apan dihang nahubog na ang suspek gihisgutan niini ang kanhi uyab sa biktima.
Ang suspetsado kinsa residente sa barangay Tisa, dakbayan sa Sugbo giingong nagduda nga may relasyon pa gihapon ang duha ug dihang wala angkona sa biktima gikulata kini sa suspek.
Tungod niini nakadesider ang biktima nga buwagan ang suspek, dihang miuwang ang ilang mga higala nasuko ang suspek ug mikuha og pinote sulod sa iyang sakyanan ug gitigbas ang biktima sa liog ug pulsohan, tungod niini miatras ang ilang mga higala sa kahadlok.
Wala pa gyud matagbaw, giingong gilangkat sa suspek ang panty sa biktima ug dayong sakay sa iyang sakyanan ug mipabulhot palayo dala ang shoulder bag sa biktima nga dunay P16,000 nga kwarta, iPhone nga nagkantidad og P36,000, P4,000, sing-sing ug ariyos nga nagkantidad og P15,000 ug P28,000.
Ang biktima uban sa ilang higala miadto kini sa police station nangayo og panabang ug gidala kini ngadto sa Cebu City Medical Center. ( EIM) - BANAT NEWS