CEBU, Philippines - Kritikal ang kahimtang sa usa ka drayber kinsa gipusil ug ang bala miungot sa iyang lawas sa usa ka pagpamanhig didto sa Sitio Lumbang barangay Polpugon, lungsod sa Consolacion niadtong Huwebes sa gabii.
Ang biktima mao si Richard Tacoloy, 23, minyo, nagpuyo sa District 5 sa barangay Pulpogan, ug usa ka drayber sa habal -habal.
Si PO2 Johnaskie Romero sa Consolacion Police Station mibutyag sa Banat News nga samtang nagmaneho ang biktima sa iyang motorsiklo pag-abot sa mingaw nga lugar giatangan kini sa wala hiilhing kriminal ug gipusil.
Nasabak ang biktima sa luyong bahin sa bat-ang, ug tuong paa ug may bala nga wala makalapos ug miungot sa lawas niini.
Ang kriminal misibat dayun human sa hitabo samtang ang biktima gihatud usab dayon ngadto sa Vicente Sotto Memorial Medical Center (VSMMC) sa dakbayan sa Sugbo.
Matud ni PO2 Romero nga ang biktima anaa sa talandugong kahimtang tungod sa bala nga miungot sa lawas niini.
Ang kapolisan padayon pa sa ilang hot pursuit operation pag-ila sa kriminal ug sa motibo niini. (/WC) - BANAT NEWS